15

Ma se mi no ghe 'navesa voia, de far tute ste robe? Se a tut quel mondo diverso, che 'l cambia de dì 'n dì, ghe disesa del nar en mona, che mi stago chì scondù sot al let? Voi dir, 'sa sucedel? Rombi di tuono e fulmini che me fulmina? Opure va avanti tut gualif, nisuni se nascorze de nient, e vegnin finalmente a capir che se ghe son o no ghe son no cambia 'n cazo?
Sì, vero, 'l dovere l'ei 'l dovere. Le robe le va fate, e no ghe piove. No podo meterme soto la scala, 'ncuciolà, a bater broche dala paura, e sat perchè no podo? Perchè podo no farlo, e quindi devo.
 Ma, vaca dio, 'l mondo 'l deventa sempre pù brut, e pù 'ncasinà.
 Distese de pali dela luce, de capanoni de cemento, de case vece (no _antiche_, vece demò) voide, cole finestre stropade coi matoni, perchè i desperadi noi ghe vaga dentro, che i staga fora, i morti de fam, a morir anca de fret. E spuza, e fum, e troie per strada, troie schiave, col gris dela nebia 'n tei oci.
 Ma dio polveroso, ma 'ndò sente finidi? 'N ten posto 'ndò che ghè i siori e i poreti, e niente 'n mez? Come zinquezento ani fa?
 'N ten posto 'ndò che tut spuza de merda, ma arquanti i se mete 'l parfum?
 'N doe che la pianura l'ei schiava e le montagne serve, e la zent la pianze de scondon?
 Ma la zent, la zent vera, 'ndò ela? E i boschi, da scampar, se noi ghè pù, 'ndò scampente?
No, no ste dirme che no ghè pù 'n'orizonte 'ndò trarse, 'n'orizonte 'ndò perderse, perchè senò per dal bon me meto soto ala scala, me ciapo i dinoci coi brazi, ghe posto sora la fronte, e stago lì, fin che moro.